۸۰ زندانی افغان از تاجیکستان به افغانستان انتقال یافت

28 Jul 2019

6  اسد 1398

تاجیکستان ۸۰ شهروند افغانستان را که در این کشور در بند به سر می‎بردند، به حکومت افغانستان سپرده است.

صبغت‌الله احمدی، سخنگوی وزارت امور خارجه به رسانه ها گفت که این زندانیان صبح روز یک ‌شنبه، ششم اسد به حکومت افغانستان سپرده شده و این هشتاد زندانی وارد کشور شده است.

به نقل از۸ صبح گفته شده است که این زندانیان به ولایت کندز رسیده است.

گفتنی است که وزارت خارجه در بیست ‌وهفتم ثور اعلام کرد که امام علی رحمان، رییس جمهور تاجیکستان در دیداری با صلاح ‌الدین ربانی در حاشیه نشست وزیران خارجه آسیای مرکزی به اضافه جاپان، تعهد کرده است که ۸۰ زندانی افغانستان را مسترد کند.
در این نشست صلاح‌الدین ربانی، وزیر خارجه از رییس جمهور تاجیکستان خواستار اجرایی شدن موافقت‌نامه «استرداد مجرمان» میان دو کشور و انتقال زندانیان به افغانستان شده بود.

با این حال، صبغت‌الله احمدی، سخنگوی وزارت امور خارجه می‌گوید که به دنبال این در خواست افغانستان، ۸۰ نفر از شهروندان افغانستان که در تاجیکستان زندانی بودند، برای ادامه محکومیت به حکومت سپرده شده است.

هرچند تاکنون روشن نیست که چه تعداد از شهروندان افغانستان در تاجیکستان زندانی‌اند، اما پیش از این نیز شماری از زندانیان افغان از تاجیکستان به کشور انتقال یافته‌اند. تاجیکستان در همسایه‌گی افغانستان قرار دارد و با چند ولایت کشور هم ‌مرز است.



Skip to toolbar